ღვინის ეროვნული სააგენტოს ფინანსური მხარდაჭერით და მარკეტინგული კომპანია Red Bridge-ის ორგანიზებით, 7-13 აპრილს, იაპონიის ქალაქებში – საპორო, სენდაი და ტოკიო – ქართული ღვინის მასშტაბური დეგუსტაციები და სემინარები, ე.წ. „Road Show“ გაიმართა, რომელშიც კომპანია „ქიმერიონმაც“ მიიღო მონაწილეობა.
ღონისძიება მნიშვნელოვანი პლატფორმა იყო ქართული ღვინის საერთაშორისო პოპულარიზაციისთვის. „ქიმერიონის“ მონაწილეობამ კიდევ ერთხელ გაუსვა ხაზი კომპანიის ერთგულებას ხარისხის, ტრადიციებისა და ინოვაციის მიმართ. დეგუსტაციებისა და პროფესიული შეხვედრების ფარგლებში კომპანიამ წარადგინა საკუთარი პროდუქცია და გაუზიარა დამსწრეებს ქართული მეღვინეობის უნიკალური მახასიათებლები.
მსგავსი ფორმატის ღონისძიებები განსაკუთრებულ მნიშვნელობას ატარებს – ისინი ქართული ღვინის მწარმოებლებს აძლევს შესაძლებლობას, პირდაპირ შეხვდნენ პოტენციურ პარტნიორებს, იმპორტიორებსა და დარგის პროფესიონალებს, რაც ახალი ბიზნესკავშირების ჩამოყალიბებას უწყობს ხელს.
„ქიმერიონი“ მომავალშიც გააგრძელებს საერთაშორისო ღონისძიებებში მონაწილეობას, რათა კიდევ უფრო გააძლიეროს საკუთარი პოზიციები გლობალურ ბაზარზე და მომხმარებელს შესთავაზოს გამორჩეული, მაღალი ხარისხის ქართული პროდუქტი.
